Ерсін Әміре ұстаздың Ақмола облысына жасаған тағылымды сапары

ҚМДБ Ғұламалар кеңесінің мүшесі, Шымкент қаласы «Сейітжан қари» мешітінің бас имамы, елімізге танымал қари Ерсін Әміре Ақмола облысы, Көкшетау қаласындағы «Науан хазірет» мешітіне арнайы іссапармен келді.

Бейсенбі күні құптан намазынан кейін ұстаз жамағатқа «Алла еске алынатын дәрістердің ерекшеліктері» тақырыбында әсерлі уағыз айтты. Уағыз барысында жүректі иман нұрымен нықтау, пайдалы ілімге ынта таныту, діни мәжілістердің қадір-қасиеті мен оның мұсылман өміріндегі орны туралы құнды насихаттар жеткізілді.

Ал жұма күні Ерсін Әміре жамағатқа жұма уағызын ұсынып, жұма намазын өзі өткізді.

Сапардың келесі бөлімінде ұстаз жергілікті теолог мамандар мен дін қызметкерлеріне «Деструктивті діни ағымдардың идеологияларына қарсы іс-қимылдардың әдістері мен нысандары» тақырыбында кең көлемді семинар өткізді. Басқосу барысында жат ағымдардың қоғамға келтірер зияны, олардан сақтану жолдары, сондай-ақ бағдарынан жаңылған жандарды дұрыс бағытқа салу әдістері жан-жақты талқыланды. Дін қызметкерлерінің кәсіби біліктілігін арттыру, халықпен тиімді байланыс орнату және түсіндіру жұмыстарын күшейту жөнінде маңызды ұсыныстар мен практикалық кеңестер берілді.

Ұстаздың бұл сапары өңірдегі діни-ағартушылық жұмыстарға тың серпін беріп, жамағаттың рухани жаңғыруына игі ықпал етті.