Науан Хазірет мешітінде дәстүрлі «Мектепке жол» қайырымдылық акциясы өтті

Бұл игі шара аясында 53 оқушыға мектеп киімдері, сөмкелер мен оқу құралдары үлестіріліп, көп балалы және әлеуметтік тұрғыдан аз қамтылған отбасылардың балалары жаңа оқу жылына қажетті жабдықтармен қамтамасыз етілді. Көмек алған балалардың жүзіндегі қуаныш пен ата-аналардың ризашылығы мешіт ұжымына үлкен алғыс болып жетті.

Айта кету керек, ҚМДБ төрағасы, Бас мүфти Наурызбай қажы Тағанұлының бастамасымен республика көлемінде жыл сайын «Мектепке жол» атты қайырымдылық шарасы ұйымдастырылып келеді. Оның басты мақсаты – әлеуметтік жағдайы төмен, көп балалы отбасылар мен жетім балаларға жаңа оқу жылына дайындық кезеңінде қолдау көрсету.