Ақмола облысы имамдары жартыжылдық есеп беріп, алдағы жоспарларды пысықтады

     2025 жылғы тамыз айының басында Қазақстан мұсылмандары діни басқармасының Ақмола облысы бойынша өкілдігінде өңір имамдарының қатысуымен жартыжылдық қорытынды жиыны өтті. Жиын барысында облыс бойынша атқарылған жұмыстардың есебі тыңдалып, дін қызметкерлерінің рухани-ағартушылық, қайырымдылық және ұйымдастырушылық бағыттарда жүргізген іс-шаралары сараланды. Атап айтқанда:

• Қасиетті Рамазан айында өткізілген қайырымдылық акциялары;

• Жамағатпен тығыз байланыс орнату және уағыз-насихат жұмыстары;

• Мешіттерде өткізілген діни, мәдени іс-шаралар;

• Жастармен жұмыс және дәстүрлі ислам құндылықтарын насихаттау;

• Медиа-кеңістіктегі ақпараттық жұмыстар.

• «Имани жаз» сауат ашу курсының нәтижесі. 

         Жиынға Ақмола облысы дін істері басқармасының басшысы Болат Нығметжанұлы қатысып облысымызда салынып жатырған мешіттермен мешіттердің құжаттарын рәсімдеу, имамдардың біліктілігін арттыру, уағыздардың мазмұнына қатысты мәселелер қозғады.   Облыс бас имамы Қуаныш қажы Жұмабайұлы жиын барысында имамдардың белсенді қызметін атап өтіп, бірқатар мешіт қызметкерлеріне алғыс білдірді. Сонымен қатар, ҚМДБ тарапынан жүктелген негізгі бағыттар мен “Ислам және отбасы құндылықтары” жылы аясындағы тапсырмалар бойынша нақты жұмыстарды күшейту қажеттігін баса айтты. Кездесу соңында 2025 жылдың ІІ жартыжылдығына арналған жоспарлар нақтыланып, төмендегідей басым бағыттар айқындалды:

• Рухани тәрбие жұмыстарының сапасын арттыру;

• Діни ағартушылықты жүйелі түрде жүргізу;

• Қайырымдылық шараларын кеңейту;

• Жастар арасында радикалды көзқарастардың алдын алу;

• Имамдардың біліктілігін арттыру семинарларын ұйымдастыру. Жиын имамдардың ұсыныс-пікірлері мен өзара тәжірибе алмасу форматында жалғасын тауып, бірлік пен ынтымақты нығайту жолында жаңа міндеттер белгіленді.