Көкшетауда РАНТ мүшесі Нұрсултан Орынбасарұлы жамағатпен жүздесті
ҚМДБ Республикалық ақпараттық-насихат тобының (РАНТ) мүшесі Нұрсұлтан Орынбасарұлы Көкшетау қаласына арнайы іссапармен келіп, бірқатар рухани-танымдық шаралар өткізді. Сапардың алғашқы күні ол “Жақия қажы” мешітінің жамағатымен кездесіп, құптан намазынан кейін “Білім алудың маңыздылығы” тақырыбында уағыз айтты. Уағыз барысында асыл дінімізде ілім ізденудің орны ерекше екендігі, әрбір мұсылманның дүние және ахирет ілімін қатар меңгеруі қажет екендігі айтылды. Жамағатқа арналып айтылған насихатта Пайғамбарымыздың (с.ғ.с.) білімге шақырған хадистері де мысалға келтірілді. Имамдардың біліктілігін арттыру мақсатында Нұрсұлтан Орынбасарұлы қала имамдарымен арнайы кездесіп, ақида мәселелеріне арналған семинар өткізді. Семинарда сенімнің негізгі қағидалары, әһлу-сунна уәл-жамаға жолының ұстанымдары кеңінен түсіндіріліп, қазіргі қоғамдағы діни танымға қатысты сұрақтарға да жауап берілді. Имамдар көкейде жүрген сауалдарын қойып, пайдалы пікірталас өрбіді. Сонымен қатар, іссапар барысында қонақ түзету мекемесіне барып, жазасын өтеушілерге уағыз айтты. Онда ол адам баласының қателесуі, тәубеге келудің маңызы және Алланың рақымы жайлы айтып, тағдыр сынақтарына сабыр етуге шақырды. Сапардың соңғы күні Нұрсұлтан Орынбасарұлы Көкшетаудың бас мешіті – “Науан Хазірет” мешітінде жұма уағызын жүргізді. Жұма намазында ол жамағатқа “Жан мен тән тазалығы” тақырыбында насихат айтып, рухани және физикалық тазалықтың мұсылман өміріндегі маңызын түсіндірді. Жүрек пен ниетті тазарту, құлшылыққа адалдық, сондай-ақ күнделікті өмірдегі тазалыққа мән беру – әрбір мұсылманның басты міндеті екендігіне тоқталды. Осылайша, ҚМДБ РАНТ мүшесінің Көкшетау қаласына жасаған сапары жамағат үшін пайдалы уағыздар мен тағылымды кездесулерге толы болды.
