Әскерилермен де, жамағатпен де кездесті

ҚМДБ Діни білім және кадр даярлау бөлімінің меңгерушісі, РАНТ мүшесі Хасан Ташайұлы Көкшетау қаласында болып, діни насихат шараларына қатысты. Алдымен Науан хазірет мешітінде құптан уағызын айтып, діни ынтымақ жайлы келелі әңгіме қозғады. Бүгін қаладағы әскери бөлімнің офицер қызметкерлермен және келісім-шарт бойынша жұмыс істеп жатқан әскерилермен кездесіп, «Отанға қызмет — мерейлі міндет» атты тақырыпта уағыз насихат айтты. Бүгінгі таңдағы әскер қатарындағы сарбаздар мен сардарлар арасындағы қарым-қатынас мәселесі тілге тиек етілді.
Ал, облыстың бас мешітінде «Исламдағы тазалықтың орны» деген тақырыпта жұма уағызын айтып, тазалық атауының сан қырын қаузады. Адамның ар тазалығынан бастау алатын жайды оның тікелей қолданысындағы ұғымға дейін тереңірек түсіндірді.